مک کال: په افغانستان کې د القاعدې په اړه د بایډن څرګندونې ظالمانه او له حقیقت څخه لیرې دي

د ۸صبح ورځپاڼه خبر ورکوي چې د طالبانو* په مرسته په افغانستان کې د القاعدې د ځپلو په اړه د بایډن له څرګندونو یوه اونۍ وروسته، د امریکې د متحده ایالتونو د آستازو د جرګې د بهرنیو اړیکو کمیټه وايي چې د بایډن څرګندونې له حقیقت څخه لرې دي.

د دغې کمېټې مشر مایکل مک کال د پنجشنبې په ورځ (د چنګاښ پر ۱۵ نېټه) په یوه بیان کې د جو بایډن د څرګندونو په اړه غبرګون وښود.

مک کال زیاته کړه چې د بایډن خبرې یوازې د طالبانو* او القاعدې تر منځ د اوږدې مودې اړیکو د سپینولو د یوې هڅې په توګه تعبیر کیدای شي، او دا ممکن د ولسمشر یوه هڅه وي چې طالبان د افغانستان د حکومت په توګه په رسمیت وپیژني.

د امریکې د آستازو د جرګې د بهرنیو اړیکو د کمېټې مشر ویلي، چې د دې موضوع (د طالبانو* په رسمیت پېژندلو) سره به مخالفت وکړي.

په اعلامیه کې راغلي: "د ولسمشر بایډن ادعا چې القاعده نور په افغانستان کې فعاله نه ده او یا دا چې طالبان* په سیمه کې زموږ د ملي امنیت ملګري شوي دي، په بشپړ ډول بې بنسټه دي."

د امریکا د استازو د جرګې د دغه غړي په وینا، د ملګرو ملتونو د خپلواک راپور له مخې، طالبان* د پیسو په ګډون القاعده ته میاشتنۍ مرستې ورکوي او د دې ډلې د دفاع وزارت په ښکاره د القاعدې څخه روزنېزې لارښوونې ترلاسه کوي.

د هغه په ​​وينا، ملګري ملتونه او لوړ پوړي امريکايي جنرالان په منظمه توګه د القاعدې د مخ پر ودې وړتياوې په اړه راپور ورکوي، چې نه يوازې د طالبانو* له خوا نه کنټرولېږي، بلکې د دې ډلې د مالي مرستو او امنيتي همکاريو له لارې پياوړې شوې ده.

دا نیوکه په داسې حال کې شوې چې د امریکې ولسمشر جو بایډن په دې وروستیو کې په یوه خبري کنفرانس کې وویل: "ما ویلي وو چې له طالبانو* څخه به مرسته وغواړو تر څو القاعده شتون ونلري، تاسو وګورئ چې زه په حق وم."

د طالبانو* له خوا د بایډن د دغو څرګندونو هرکلی وشو او له هغه وروسته دغې ډلې له واشنګټن سره د مثبتو خبرو غوښتنه وکړه.

*- طالبان د ملګرو ملتونو د سازمان تر بندیزونو لاندي دي.